من طرف أبوالشوش الثلاثاء مارس 23, 2010 5:41 pm[wow][/wow]
نداء الى صحفى نزيه
بأعرض بنط فى عرض الصحافة
مانشيت عريض احمر خطر
الشعب ضد أهل السياسة
من أوّل الساسة الذين تجرءُوا
ورفعوا العلم
دلقان يرفرف فى السما
ألوان تلاتة من الوهم
لون المياه صار فى العلم
النيل من القيف إنهدم
شخرت مواسير البلد
عِطشوا الوليدات والبهم
والأخضر البحكى الزرِع
من كُتْرَتْ الهِبهيب على
جمَّع خُدُرتو فِرِد فرع
مليون من الاميال مربعة
لابدة فى الضل تنجمع
وكُل الجهات الأربعة
من أجل كرسى بتصطرع
والشى الوحيد الصدقوا فى
إختاروا ليك لون الشحوب
الرملة زحفت
من نواة قلب الصحارى
غتغتت وهج القلوب
القلب أصبح نبضو طوب
بدت الحروب
ناس الشمال ضد الغرب
ناس الغرِب ضد الشرق
واهل الشرِق ضد الجنوب
واهل الجنوب ضد الجميع
يا بلدى ما لقيت ليك نجيع
لا حتى إحساس بى الأسى
لا إنت ساى عندك وجيع
وقعدت عريان فى الصقيع
أصبحنا لا هنا لا هناك
كوميديا فى وادى الهلاك
ما عرفنا ساكت نحن وين
مش نحنا وين
ولا حتى عارفين نحنا مين
بقينا فى إشكال هويّة
جيم وشين
ديل اربعة
زيد ليها برضك أربعين
وبين مطرقة اهل السياسة
وبين دروب الإقتصاد
الشعب واقع فى الكمين
لاغفِنُّوا لغفاً مُر وشين
واكتب
بعرض الصفحة بى البنط العريض
الشعب ضد اهل السياسة
إبتداءاً بالذين تجرّءُوا ورفعوا العلم
ثمّ عرِّج
ناحية الساسة الذين بعلمهم
كانت اكتوبر وهم
أكتوبر الترف الخرافي
الثورة ضد عسكر نبيل
كم من الشُهدا الضحايا
لاكوا حلماً مستحيل
الشعب واوراق الشَدَرْ
هزموا الغريم
تارى الفروع الكانوا شالوها الغلابة
أكَّان رجال أكَّان حريم
بى حِس شفيف
استشرفوا الآتي الأليم
رفعوا الفروع
جاييهم الزمن العديل
راح ياكلوا نيم
واتزحزح الكرسى اللِبِسْ كاكى
ولِبِسْ بدلة وعباية
والمساكين
داخوا ليك الدوخة زاته
سرحوا فى كم حلمة جاية
بس دوَّرت حرب البيوت
بين سِيدنا دا
وبين سيدنا داك
بين داك شيوعى إبن جِن
واسلامى بحرسوا كم ملاك
ونحنا المساكين الغلابة
وقعنا فى شَرَك الشِباك
والكرسى طقطق تحتهم
ختفوا النمر بس بختهم
رِكْبوا ام جناحين واتَّكُوا
كنزوا الكنوز
زمن الحُكُم
ما ضيَّعوا واتْلَكَّكُوا
خلٌّونا نبدا من الطلايع ونلعنم
ديل ساسة ما ليهم أمان
الله يقلقِل مرقدُم
واكتب
بأكبر حرف ممكن
من حروف المطبعة
الشعب ضد اهل السياسة
لأنَّهُم تب ما معا
هُم فى اتجاه المصلحة
والفايدة أُم المربحة
أَمَّا الرعاع
إنشا الله نُص المذبحة
ما يهمهم كاكى بيسوس
أو بوت بدوس
أو ناس تلوص
أو تمشى لى بيت النمل
لى العيش تكوس
بس المهم
السادة آخِر منظرة
ونحنا الرعاع لى الإيد نبوس
نختم على القول السديد
راى سيدنا ما ضو الشموس
حاربوا النمر
صالحوا النمر
محمود كذَب ، محمود صدق
أهو حالة الدنيا العبوس
ومرَّت ايام مايو ديك
المنفى لى الجُندى المليك
ما الكرسى ما بيدور شريك
ونفس الذين هتفنا لمَّن مايو جات
لى كونهم فاتوا البلد
والحُكمهم بى السكتة مات
زى النبات الفى الخلا
بيقوم بروس
مدُّوا الرؤوس
نفخوا الجضوم
فارولنا فورة الأندروس
وأنحنا بى قلب التعابة المرهقين
صدَّقنا أقوال الخُطَب
ما فينا حاجة من العرب
الحرف بِعمل فينا شِى
كان إنقرا وكان إنكتب
إلا الأبالسة المترفين
عارفين حلاوة الكتف وين
وكيف نُقطة الدم عِندنا
ومزج العرق
بصبح دهب جُوًّة الجيوب
النهب دوَّر فى الغرب
اتساقطت مُدُن الجنوب
ما كُلُّو بى إسم النضال
درب القروش ياهو الحروب
وبين ايدلوجيا اهل اليسار
أو بين أهل المذهبِ
شوف الأبالسة المترفين
زى التقول أولاد نبى
كم مره جرجروا فى الكلام
بس إِلَّا شوف شعبى الأبى
دايماً يُصدِّق ما يقال
باللهِ مُش فهماً غبى
والكرسى دوّر دورتو
وطار فى الهوا
إتجابدوهو فى كم شهر
ما اتفقوا ليك إتنين سوا
ونطَّالك الكاكى ابزرد
الشعب هلَّل فى الطريق
تارى الأتان جابت ولد
ما الكاكى كيفن عاد بكون
هوَّ الملاذ من الجنون
الكاكى أخّدَر فى الأصل
لكن بكون ما عندو لون
ورَّاكم الكاكى الفنون
الكاكى كان لابس دقون
واكتب وبى الحرف الكبير
من فوق على الترويسة
بى الخط الملوَّن لون خطير
الشعب ضد اهل السياسة
من النقابى المرتشى
لامِن تصل درجة وزير
وبى أىِّ حزب رفع شعار
حرية الشعب الاجير
لو كانو مُؤتلفين سوا
واختلفوا فى مقعد وزير
لو كانوا ضد الإنقلاب
او أيَّدو
او ناموا مرة على الحصير
ما السادة هم السادة بس
رغماً عن الجمع الغفير
واولادم السادة الجُدُد
مُش هو الأمير ود الأمير
يقرا في مدارس بره ديك
ويجيكا همبول دار يطير
او يقرا فى نُص البلد
مليونو يسبق أىِّ صاح
ونتيجتو بس عند المدير
وانت يا الشعب المَطَمَّشْ
فى الدروب نص الهجير
ولدك دا قُرّاً ينفخو
شِن فايدة الضو لى الضرير
أكَّان قرا وعِرْف النَّضِم
مين تانى بيسوق الحمير
والشعب عاش
فى ملحمة حق الملاح
حفر الارض ضاق الجراح
والساسة صَنْقَعُوا لى السما
طَلَعُولا صاح
قامت عمارات البلاد
مسقيّة بى عَرَق العِباد
كُل الصعاليك إغتنوا
زادوا المُدُن كم إمتداد
وكم شيخ بيخطب فى قضايا المرحلة
فى بيتو عايش كالملوك
لهفوا البنوك
وإحْنا بنلوك
فى الصبر لوك
وآخر المطاف
إتشكلو ليك شَكَلْ الديوك
حُرمَة الشيخ إنتهت
هِيبة الرئيس إتفتَتت
اصبحنا فى الجو العِكِر
شوف هَسِّى بى مر السنين
الحالة وصلت بينا وين
مُشْ حالة أزفر من زِفِر
ديل اربعة بعد اربعين
مضروبة فى السبعة العظام
فى الآخر الناتج صِفِرْ
31/12/2002
نداء الى صحفى نزيه
بأعرض بنط فى عرض الصحافة
مانشيت عريض احمر خطر
الشعب ضد أهل السياسة
من أوّل الساسة الذين تجرءُوا
ورفعوا العلم
دلقان يرفرف فى السما
ألوان تلاتة من الوهم
لون المياه صار فى العلم
النيل من القيف إنهدم
شخرت مواسير البلد
عِطشوا الوليدات والبهم
والأخضر البحكى الزرِع
من كُتْرَتْ الهِبهيب على
جمَّع خُدُرتو فِرِد فرع
مليون من الاميال مربعة
لابدة فى الضل تنجمع
وكُل الجهات الأربعة
من أجل كرسى بتصطرع
والشى الوحيد الصدقوا فى
إختاروا ليك لون الشحوب
الرملة زحفت
من نواة قلب الصحارى
غتغتت وهج القلوب
القلب أصبح نبضو طوب
بدت الحروب
ناس الشمال ضد الغرب
ناس الغرِب ضد الشرق
واهل الشرِق ضد الجنوب
واهل الجنوب ضد الجميع
يا بلدى ما لقيت ليك نجيع
لا حتى إحساس بى الأسى
لا إنت ساى عندك وجيع
وقعدت عريان فى الصقيع
أصبحنا لا هنا لا هناك
كوميديا فى وادى الهلاك
ما عرفنا ساكت نحن وين
مش نحنا وين
ولا حتى عارفين نحنا مين
بقينا فى إشكال هويّة
جيم وشين
ديل اربعة
زيد ليها برضك أربعين
وبين مطرقة اهل السياسة
وبين دروب الإقتصاد
الشعب واقع فى الكمين
لاغفِنُّوا لغفاً مُر وشين
واكتب
بعرض الصفحة بى البنط العريض
الشعب ضد اهل السياسة
إبتداءاً بالذين تجرّءُوا ورفعوا العلم
ثمّ عرِّج
ناحية الساسة الذين بعلمهم
كانت اكتوبر وهم
أكتوبر الترف الخرافي
الثورة ضد عسكر نبيل
كم من الشُهدا الضحايا
لاكوا حلماً مستحيل
الشعب واوراق الشَدَرْ
هزموا الغريم
تارى الفروع الكانوا شالوها الغلابة
أكَّان رجال أكَّان حريم
بى حِس شفيف
استشرفوا الآتي الأليم
رفعوا الفروع
جاييهم الزمن العديل
راح ياكلوا نيم
واتزحزح الكرسى اللِبِسْ كاكى
ولِبِسْ بدلة وعباية
والمساكين
داخوا ليك الدوخة زاته
سرحوا فى كم حلمة جاية
بس دوَّرت حرب البيوت
بين سِيدنا دا
وبين سيدنا داك
بين داك شيوعى إبن جِن
واسلامى بحرسوا كم ملاك
ونحنا المساكين الغلابة
وقعنا فى شَرَك الشِباك
والكرسى طقطق تحتهم
ختفوا النمر بس بختهم
رِكْبوا ام جناحين واتَّكُوا
كنزوا الكنوز
زمن الحُكُم
ما ضيَّعوا واتْلَكَّكُوا
خلٌّونا نبدا من الطلايع ونلعنم
ديل ساسة ما ليهم أمان
الله يقلقِل مرقدُم
واكتب
بأكبر حرف ممكن
من حروف المطبعة
الشعب ضد اهل السياسة
لأنَّهُم تب ما معا
هُم فى اتجاه المصلحة
والفايدة أُم المربحة
أَمَّا الرعاع
إنشا الله نُص المذبحة
ما يهمهم كاكى بيسوس
أو بوت بدوس
أو ناس تلوص
أو تمشى لى بيت النمل
لى العيش تكوس
بس المهم
السادة آخِر منظرة
ونحنا الرعاع لى الإيد نبوس
نختم على القول السديد
راى سيدنا ما ضو الشموس
حاربوا النمر
صالحوا النمر
محمود كذَب ، محمود صدق
أهو حالة الدنيا العبوس
ومرَّت ايام مايو ديك
المنفى لى الجُندى المليك
ما الكرسى ما بيدور شريك
ونفس الذين هتفنا لمَّن مايو جات
لى كونهم فاتوا البلد
والحُكمهم بى السكتة مات
زى النبات الفى الخلا
بيقوم بروس
مدُّوا الرؤوس
نفخوا الجضوم
فارولنا فورة الأندروس
وأنحنا بى قلب التعابة المرهقين
صدَّقنا أقوال الخُطَب
ما فينا حاجة من العرب
الحرف بِعمل فينا شِى
كان إنقرا وكان إنكتب
إلا الأبالسة المترفين
عارفين حلاوة الكتف وين
وكيف نُقطة الدم عِندنا
ومزج العرق
بصبح دهب جُوًّة الجيوب
النهب دوَّر فى الغرب
اتساقطت مُدُن الجنوب
ما كُلُّو بى إسم النضال
درب القروش ياهو الحروب
وبين ايدلوجيا اهل اليسار
أو بين أهل المذهبِ
شوف الأبالسة المترفين
زى التقول أولاد نبى
كم مره جرجروا فى الكلام
بس إِلَّا شوف شعبى الأبى
دايماً يُصدِّق ما يقال
باللهِ مُش فهماً غبى
والكرسى دوّر دورتو
وطار فى الهوا
إتجابدوهو فى كم شهر
ما اتفقوا ليك إتنين سوا
ونطَّالك الكاكى ابزرد
الشعب هلَّل فى الطريق
تارى الأتان جابت ولد
ما الكاكى كيفن عاد بكون
هوَّ الملاذ من الجنون
الكاكى أخّدَر فى الأصل
لكن بكون ما عندو لون
ورَّاكم الكاكى الفنون
الكاكى كان لابس دقون
واكتب وبى الحرف الكبير
من فوق على الترويسة
بى الخط الملوَّن لون خطير
الشعب ضد اهل السياسة
من النقابى المرتشى
لامِن تصل درجة وزير
وبى أىِّ حزب رفع شعار
حرية الشعب الاجير
لو كانو مُؤتلفين سوا
واختلفوا فى مقعد وزير
لو كانوا ضد الإنقلاب
او أيَّدو
او ناموا مرة على الحصير
ما السادة هم السادة بس
رغماً عن الجمع الغفير
واولادم السادة الجُدُد
مُش هو الأمير ود الأمير
يقرا في مدارس بره ديك
ويجيكا همبول دار يطير
او يقرا فى نُص البلد
مليونو يسبق أىِّ صاح
ونتيجتو بس عند المدير
وانت يا الشعب المَطَمَّشْ
فى الدروب نص الهجير
ولدك دا قُرّاً ينفخو
شِن فايدة الضو لى الضرير
أكَّان قرا وعِرْف النَّضِم
مين تانى بيسوق الحمير
والشعب عاش
فى ملحمة حق الملاح
حفر الارض ضاق الجراح
والساسة صَنْقَعُوا لى السما
طَلَعُولا صاح
قامت عمارات البلاد
مسقيّة بى عَرَق العِباد
كُل الصعاليك إغتنوا
زادوا المُدُن كم إمتداد
وكم شيخ بيخطب فى قضايا المرحلة
فى بيتو عايش كالملوك
لهفوا البنوك
وإحْنا بنلوك
فى الصبر لوك
وآخر المطاف
إتشكلو ليك شَكَلْ الديوك
حُرمَة الشيخ إنتهت
هِيبة الرئيس إتفتَتت
اصبحنا فى الجو العِكِر
شوف هَسِّى بى مر السنين
الحالة وصلت بينا وين
مُشْ حالة أزفر من زِفِر
ديل اربعة بعد اربعين
مضروبة فى السبعة العظام
فى الآخر الناتج صِفِرْ
31/12/2002